උතුමාණෙනි ඔබ
භූපතිය
උදක පතීය
තරුපතීය
පාතාල පතීය
සියල්ලට අධිපති බැවින් ඔබ
ඒකාධිපතිය......!
සර්ව ඥානය
සර්ව තෝභද්රය
සර්ව බලධාරීය
උතුමාණෙනි....! එහෙයින් ඔබ
සර්ව භක්ෂකය.....!
එනිසාම ඔබට
දැඩි ආරක්ෂාවක් අවශ්යය.....!
පොලිසිය, උසාවි, හිරගෙවල්
නීතිපොත්, කුරාණය, බයිබලය,
ධම්මපදය...!
කුමන වට්ටෝරුවකින් උනත්
ඔබ කැමති තැනකින්
ඔබේ ශ්රී මුඛයෙන්
දෙසන ධර්මය
මර්ධනය........!"
ඔබේ සුව නින්දට
මුද්රිත අකුරු තීන්ත කඩදාසි
තහනම් කරන්න...!
අච්චුකන්තෝරු සීල්කර තබන්න.
සත්ය සිරකර
මූඩිය තදකරගෙන අල්ලා ගෙන සිටින්න.....!
එහෙත් මම කියමි.....!
මහජන කැළඹීමකට
එක අඟුරු කැබැල්ලක් සෑහේ........!
ජනතා උද්ඝෝෂණ තහනම් කරන්න
ජනතාවගේ මුණු මුණු ගෑම
බර අවි වලටත් වඩා අනතුරුදායකය
ඊළග සටන් පාඨ
වෙඩි උණ්ඩ පවා නැවත හරවා යවයි.....!
ඔබට කියමි
රුධිරය වඩාත් සංවිධානාත්මකව ඇවිලේ....!
නැතිවෙන්න දෙයක් නැති
ජිවිතය විතරක් අයිති
නුඹලාට මම කියමි....
කුහුඹුවනි....!
අර්බුදයේ මුල් හේතුව
සොයා ගත යුතුය තෙපි....!
කරුණාකර ඉතිහාසයෙන් මම අසන
ප්රශ්න වලට උත්තර දෙන්න.....?
ඇඩලොප් හිට්ලර් පොළොව යට
බිං ගෙයක දිවිනසාගත්තේ මන්ද......?
ඉඩි අමින් රහසේම ටැන්සානියාවට පලාගියේ මන්ද...?
මුසෝලනිගේ මලසිරුරටත් මිනිසුන්
පහර දුන්නේ ඇයිද....?
සුවිසල් ආයුධ ගබඩා
ලක්ෂ සංඛ්යාත කුලී හමුදා
නොසිට ඔවුන්ගේ තනියට
වාෂ්ප වීද.....?
කුහුඹුවනි!
දුෂ්කරම අවස්ථාවන්හිදී
සිරුරේ බරමෙන් දස ගුණයක් ධෛර්ය අවශ්යය........
නුඹේ පරපුරට අහිමි කළ දවස් මිස
අහිමි වීමට දෙයක් නැත නුඹට
දිනාගත යුතු මිස.....!
මේ මජර ක්රමයෙහිම
මිනීවල කපන උන්
උන්උන්ම තනාදෙති.....!
ඉතිහාසයේ දැති රෝද
ලේවැල්වලම පැටලුනි......!
මක්නිසාද යත්,
මිනිස් ඉතිහාසයට
යුක්ති සහගතම ජීවත් වීමක්
අවශ්ය වූ බැවිනි.....
උතුමාණෙනි...!
ඒ ගමන නවතනු නොහැකිය.
නැවතත් මතක්කර දෙමි......!
රුධිරය ඉන්ධන වලට වඩා
සංවිධානාත්මකව ඇවිලේ.....!
- සැකකාරයා -
No comments:
Post a Comment